domenica 22 marzo 2015

Cascina Reina: la fame del gourmet


Ah, che fam che g’ho, me g’ho ‘na fam ca pe’ la desperasiu’ ‘l cervel m'è ‘sciupà de fo’!

G’ho ‘na fam ca me majarès anca le prède e la pòlver de 'l stradù che g’ho ché diànti.

Ma cuzè che me vèt?

öna casìna?

Sènt che frecàs che la ‘rìa de lé, ‘nduè la lüs.

‘n bel calùr, stà atènt che ché se trùa ergòt de bù da mandà zò ‘n del stòmech?

Spèta, che me toca de lès ché ‘l cartèl…

Cascina Reina, te fazo me regìna sa stasira me fa maià e bif de ‘l bù, regìna mia!

Ta 'l dìs che "se maia chel che g'he, se àrda chel che gh'era e se sta pròpe bè"?

Me maia po' te, del dì bù, e sì che a maià se sta pròpe bè!

‘nduè so’ capitàt?



Àrda te che bel camì, co’l föch gròs, che brüza, sa pöl cüzinà ògne ben de Dèo.

‘nfàti, su töta la capa l’è piè de marmite, padele, pignète, ma pusèbel che ‘l stà lè a pènde zò sènsa nisü che le metìga dèt ‘n tochèl de bötér, salvia, rusmarì pèr fa zò ‘n bel pucì de güstà?


Ah, ma àrda te sö sö 'l tàol che buntà, co la panséta, la còpa, co ‘l gras sügùs che me fa lecà sö i barbìs!

‘l strachì che me ‘mpasta la maiadùra!

Oh sigòle bele agre da mastegà.

Ché gh’è ergü che me cognòsse, perché sa che me adùre i balusèc co i fazöi.


E càl laùr ché?

‘Na rèsega per teà zò ‘l salàm?

Me ne g’ho teàt zò ‘n bel po’ perché me ne ürìe fa ‘na paciàda!



‘l , vì gròs, s’cèta, mèna zò ‘vì dèt de le scüdèle, per impienì la pansa e la crapa!



Adès me ‘ncumenze a vèt dòpe, ànse, l’è ‘l pröm che l’è dòpe: gh’è ‘l rizòt e i casonsèi, che co’l bötér e ‘l formài me fàn andà fò de cò!

E ‘ntat che ‘l padrù l’è drè a mèt zò òtra lègna al föch, rìen òtri piac e basèle, chè se va fò de cò del bù!



De ‘na banda l’ròst de pursèl, de l’òtra ‘l mans strecòcc, carne sustansiùsa e sügùsa.

E càl laùr lè?

Se l’è bù!

Fenòcc co’ la balsamella, passàt dèt ‘n de ‘l fùren, e ‘n po’ de cügianàde de pulènta còlda, ‘n bucù de rè!



Me so sudisfàt del bù, po’ si me g’ho amò ‘n cantusì dèt de ‘l stòmech da ‘mpienì co’ ‘na fèta de tùrta dòlsa, franca, co’ la marmelàda, me maiarès po’ ‘l piàt e la furselìna!

25 €, e gh’è pür ‘l cafè e l’amaro, l’è ‘n’afàre che ta sa 'nsognerèset pó da nòc…

................................................................................................................................

Eh?

Ta ‘l dìs che ‘l’è stàc töt ‘n sògn?

Alura ‘l’è mia ìra che me g’ho maiàt töta chèla roba lè?

E gnàch che me g’ho pagàt isé pòch per töte chele bontà?

Ah, che zgàgia, l’è proprie ìra che töta sta fantazìa la cònta come l'ömbra d'ün azen!

Agriturismo Cascina Reina
via per Bariano
24043 Caravaggio (BG)
tel. 0363 52840
Aperto Ven-Sab cena/Dom pranzo
solo su prenotazione

Nessun commento:

Posta un commento